L'Institût si lu à inmaneât intal utubar 1974, e aduncje al à zaromai 35 agns di ativitât, cuntun patrimoni pardabon notevul di esperiencis; nol à dome che la funzion di centri di ricercje su la storie contemporanie, siben ancje di servizi culturâl intal sens plui ampli di cheste peraule.
I siei fins a son la racuelte, la catalogazion e la conservazion di documents di ogni sorte in cont de storie contemporanie dal Versein, dal Bielês e de Val de Sesie, cuntun riferiment particolâr al antifassisim, ae Resistence, al moviment dai operaris e dai contadins.
L'Institût, in plui di favorî la consultazion di cheste documentazion, al prudele studis storics, al clame conferencis, convignis e cors di inzornament, al prodûs videotapes, al publiche libris e une riviste.
Il patrimoni dal Institût al è oremai dutafat rimarchevul: centenârs di miârs di documents, miârs di volums, centenârs di testadis di periodics, di films e di videocasselis.
Archîf, biblioteche, emeroteche, audio-foto-cine-videoteche, bancjis di dâts, bibliografiis, mostris e altris servizis varis a son a disposizion dai ents locâi aderints, des scuelis, des bibliotechis, des associazions culturâls, dai ricercjadôrs, dai insegnants e dai students: di ducj chei, insumis, che a bramin di cognossi la storie de nestre tiere.
(Voltât di Angelo Pittana)