L'Institu pe l'istoére de la Resistance
et de la societÓ actuyella
de province de Biella et de Verceil

Fondà lo mèis d'ottobre 1974, donque ara l'at dza pi de 35 an d'actività, cen que féit un remarcablo patrimoéno d'esperiance, l'Institu se presente, in pi que comme un centre de retsertse d'istoére actuyella, étot comme un servicho culturel vu din lo sans pi lardzo di mot.
Se beut son le retsertse, l'assembladzo et la conservachon di documen de n'emporte quin janre que concernon l'istoére actuyella de la province de Biella, de la plana de Verceil et de la Val Ses avouë euna attenchon particulliëre pe l'anti-fachisme, la Resistance, le movemen di s-ouvrë et cice di campagnar.
In pi de favorisé la conseuta de cetta documentachon, l'Institu incoradze le s-étudze istorique, organise de conférance, de recontro, et de stage de perfechonnemen, produi de video-tap, i peublie de lëvro et euna revuya.
Lo patrimoéno de l'Institu l'est, voueu lo dzor, remarcablo: i l'est formà de centèine de meulle documen, quaque meulle s-ouvradzo, de centéine de collechon de journal, de revuye et de video-cassette.
Archive, bibliotéque, émerotéque, odio-foto-cinemà-videotéque, élemen et informachon, esposechon et un mouë d'atre servicho son a disposechon di s-instituchon locale associàye, di s-écoule, di s-associachon culturelle, di s-instituteur et di professeur, di tsertseur et di s-étudian: donque a disposechon de tseut cice que son interèchà a l'istoére de noutro territoéro.
(Traduchon de Raymond Vautherin)